Амыдыралының 78-ки чылынче кирип бар чорааш, бистиң хайыралыг эргим, ханы ынак киживис, кады чурттаан эжиниң быжыг даянгыыжы; ийи кызының, чаңгыс оглунуң үлегерлиг адазы; хөй санныг уйнуктарының кырган-ачазы, улуг өгбези, кады-төрээннеринин эргим дуңмазы,акызы, улуг угбазының ынак дуңмазы, дуңмалары-чээннериниң эргелиг акызы, даайы, чуржааттарының честези, кенээт-күдээлериниң хүндүткелдиг бээзи, каты,эдеришкен эш-өөрүнүң шынчы эжи-өңнүү, ызыгуур салгаан мурнакчы малчын, Улуг-Хем кожууннуң база Арыскан сумузунуң хүндүлүг чурттакчызы– Самдан Хүлер-оол Кыргысович( ПОЧТАЛЬОН) аар аарааш, 2023 чылдың декабрь 6-да чырык өртемчейден чарлып чорутканын бүгү-ле чоок улузунга, төрелдеринге, кудаларынга, эш-өөрүнге, өргүн көвей чонунга ханы кажыыдал-биле дыңнаттывыс.
Хып дээн чалыы үезинде Каа-Хем кожуунга комсомолчу путёвкалыг өөнүң ишти-биле малчыннап ажылдап эгелээш, бүгү назынында күрүне малын ак сеткилдиг малдап чорааннар. "ҮТКА-ның 25 чылы" аттыг совхозтуң Арыскан салбырынга мурнакчылар одуруундан дүшпейн, шээр малды күрүнеге муң-муңу-биле өстүрген. Харылзаа шугумун таварыштыр ыраккы малчын коданнарже кыш-чай дивейн аьттыг солун-сеткүүл чедирип, почтачының бачым ижин база хөй чылдарда кылып келген. Аныяанда айыыл-халапка таварышкаш, ийи бут чок бертик-межел болуп артса-даа, кадык кижилерден-даа артык човулаңның бектээнге алыспайн, быжыг тура-соруктуун черле салбайн, чүгле бурунгаар чүткүлдүг күженип чорааш, чаныш-сыныш чогун чонунга төлептии-биле көргүскеш, үнелеп четпес үлегер-чижекти арттырганы, бистер бүгүдениң чоргааралын оттурган. Чону дээш, чурту дээш чурттап эрткен оруктарын чону эки билир. Чарышка салыр чүгүрүк малдарны соодарынга мергежээн, аът дээнде тынын садар чыгыы чорааны онзагай. Үе-шагның аайы-биле хууда дузалал ажыл-агыйын сайзырадып, кодан долдур дөрт чүзүн малды өстүрүп, ажы-төлүнге бажың-балгат тудуп берип, өмек-дөмек дузазын амыдыралының сөөлгү хүннеринге чедир көргүзүп шыдаан. Буян-кежик бодарадып чурттап каан чаагай изин ооң чону кажан-даа утпас, чырыткылыг овуру бистиң чүректеривиске тураскаал болуп артар.
Сөөлгү оруунче декабрь 9-та , 9шактан 11ш40ге чедир Арыскан суур Титова 10дан үдээр. Харылзажыыр телефон дугаарлары:
89232624446- уруу
89233890779- оглу
