....?В О З Ь М А С Ь К О.?....
* * *** * *
Пиослы, кудъёсыз улонзэс жалятэк ожмасько Атыкай Музъеммы понна. Нылъёслы, нылкышноослы, кудъёсызлэн оскемзы потэ быдэс но таза бертозы шуыса:

Возьмасько оскыса,
Тон бертод вормыса,
Укноям йыгаськод,
Мон доры лыктыса.
Ӟыгыртод, чупалод,
Ки вылад ӝутыса,
Мӧзмемме верало,
Гадь бордам ӝиптыса.
Веразы ке мыным,
Тон бырид ожлудын,
Уг, уг оскы солы,
Тон котьку сюлэмын.
Сюлэмын тон, куке,
Лымыя, куазь зоре,
Сюлэмын тон, куке,
Уй сильтӧл лек вузэ.
Сюлэмын тон, куке,
Осконэ но быре,
Тодӥсько — тон улэп,
Лобаськод кытын ке.
Оскисько, мусое,
Шӧдӥсько мон сое,
Пумиськом куке но,
Тодӥсько мон одно...
Туриос лобӟозы,
Сьӧразы калъясько,
Ой, мӧзме сюлэмы !
Весь тонэ утчасько...
Инбамын гудыртэ,
Вазисько Инмарлы.
Тынэсьтыд коть лулдэ,
Мед лэзёз мон доры,
Адӟиськын огдырлы.
Зор шапык луыса,
Возьвылэ усьылод,
Италмас луыса ,
Луд вылэ ӝужалод.
Мон тонэ тодмало,
Тон тӧлъя шильыртод,
Шундыя бергаса,
Мон шоры учкылод.
Возь вылэ выдыса,
Мон тонэ ӟыгырто,
Улэпву луыса,
Выжыяд пыӵало.
Яратон улӟытоз,
Улӟытоз — тодӥсько,
Мон солы оскыса ,
Весь тонэ возьмасько...

Тодӥсько... Оскисько... Возьмасько...
Асьмеос одӥгпол пумиськом.
Тон сямен, кулонэз вормыса,
Льӧль сяська луыса ӝужало.
Тынэсьтыд мӧзмемме вераса,
Мон тӧлъя куаръёсын
шильырто,
Ыркыт тӧл нош монэ жаляса,
Кылъёсме тон доры мед
вуттоз:
,,- Возьмасько... Оскисько...
Куке но мон доры
тон бертод,
Гадь бордад ӝиптыса
чупалод,
Яратон кылъёстэ, мӧзмыса,
Быдэс уй пельёсам
сипыртод..."

Тулыспал, 2022 ар.